Enver Hasani thotë se aktgjykimi i fundit i Gjykatës Kushtetuese nuk i lë mundësi deputetit serb, Nenad Rashiq që të zgjidhet nënkryetar i Kuvendit.
Ish-kryetari i Gjykatës Kushtetuese tha në një intervistë me shkrim për Gazetën Express se në këtë pikë, vendimi është “i qartë”.
“Jo. Aktgjykimi, në arsyetimin e tij, është i qartë: përfaqësuesit e shumicës serbe kanë prerogativën kushtetuese për propozim. Ky ka qenë dhe mbetet një e drejtë e pastër kushtetuese, e përcaktuar qartë në tekstin e Kushtetutës së Kosovës. Komunitetet përfaqësohen nga ata deputetë që kanë marrë votat e shumicës së komunitetit përkatës dhe që janë deklaruar, para dhe gjatë zgjedhjeve, se e përfaqësojnë atë komunitet. Rashiqi nuk e përfaqëson komunitetin serb; atë, sot për sot, e përfaqëson partia “Lista Serbe””, thotë ai.
Gjykata konstatoi se procedura për zgjedhjen e Emilija Rexhepit nënkryetare e Kuvendit nga komunitetet e tjera minoritare joserbe nuk është në kundërshtim me Kushtetutën. Sipas Hasanit, Kushtetuesja në këtë rast e ‘amnistoi’ këtë veprim duke ia “shpëtuar fytyrën” LVV-së.
“Duke “amnistuar” zgjedhjen e zonjës Emilia Rexhepi, Gjykata Kushtetuese ka “shpëtuar fytyrën” e LVV-së, por njëkohësisht ka krijuar iluzione tek ata se, me presione terrorizuese, mund të fitojnë koncesione edhe në të ardhmen – koncesione që mund të çojnë në zgjedhjen e një serbi “të mirë për pushtetin”, por që nuk e përfaqëson komunitetin serb në Kosovë”.
Kjo qasje e Kushtetueses, sipas Hasanit, “mbetet e paarsyetuar dhe, ndoshta në të ardhmen, do të krijohen rrethana të tjera për ta qartësuar”.
