Në kuadër të pjesëmarrjes në panairin ndërkombëtar të mbrojtjes “AUSA 2025”, ministri në detyrë i Mbrojtjes, Ejup Maqedonci, zhvilloi një takim me drejtorin e Agjencisë për Bashkëpunim në Mbrojtje dhe Siguri të Departamentit të Mbrojtjes së Shteteve të Bashkuara të Amerikës, Michael F. Miller.
Bashkëbiseduesit diskutuan për bashkëpunimin e deritanishëm në fushën e mbrojtjes, me fokus në prokurimin e pajisjeve dhe sistemeve të armatimit përmes mekanizmit Foreign Military Sales (FMS), i cili ka mundësuar realizimin e marrëveshjeve “shtet me shtet” me SHBA-në, duke garantuar cilësi të lartë dhe kosto të ulët për produktet e prokuruara nga FSK-ja.
Në takim morën pjesë edhe zëvendëskomandanti i Forcës së Sigurisë së Kosovës, gjeneralmajor Enver Cikaqi, atasheu i mbrojtjes i Republikës së Kosovës në SHBA, kolonel Sylejman Cakaj, si dhe drejtori i Departamentit për Bashkëpunim Ndërkombëtar dhe Integrime Euro-Atlantike, kolonel Ahmet Ajeti.
Palët gjithashtu shkëmbyen mendime rreth prokurimeve të ardhshme, si dhe për kontributin që Kosova i ka dhënë Ukrainës në kuadër të mbështetjes ndërkombëtare.
Drejtori Miller përgëzoi Republikën e Kosovës për nënshkrimin e Marrëveshjes së Bashkëpunimit për Ndërveprueshmëri dhe Siguri në Komunikim (CISMOA), duke e cilësuar atë si një hap të rëndësishëm drejt forcimit të partneritetit dypalësh ndërmjet Kosovës dhe Shteteve të Bashkuara të Amerikës.
Me herët ministri n detyrë i Mbrojtjes mori pjesë në shënimin e 250-vjetorit të themelimit të Ushtrisë së Shteteve të Bashkuara të Amerikës.
Në këtë eveniment Maqedonci u ftua nga Asociacioni i Ushtrisë Amerikane (AUSA), ku po merr pjesë në Konferencën Vjetore dhe Panairin e Industrisë së Mbrojtjes “AUSA 2025”, që po zhvillohet në Uashington D.C., me pjesëmarrjen e 92 përfaqësuesve të vendeve të botës.
Panairi AUSA-së, i organizuar në kryeqytetin amerikan është një platformë strategjike që bashkon udhëheqësit më të lartë ushtarakë, inovatorët e industrisë së mbrojtjes, politikbërësit dhe delegacionet ndërkombëtare në një takim vjetor.
Ngjarja, e cila do të zgjasë tre ditë, ofron mundësi të rëndësishme për të eksploruar teknologjitë më të avancuara ushtarake dhe për të thelluar bashkëpunimin ndërkombëtar në fushën e sigurisë dhe mbrojtjes me synim shqyrtimin e mundësive për zhvillimin e mëtejshëm të Forcës së Sigurisë së Kosovës, në përputhje me nevojat, prioritetet dhe standardet bashkëkohore të mbrojtjes
