Policia e Kosovës ka njoftuar për një incident me armë zjarri që ka ndodhur mbrëmjen e së martës, më 14 tetor 2025, në Mitrovicë. Sipas informacioneve zyrtare, rreth orëve të mbrëmjes në Stacionin Policor Jugu është pranuar një informatë për të shtëna me armë në një lagje të qytetit.
Njësitet policore janë mobilizuar menjëherë pas pranimit të informatës dhe kanë arritur të lokalizojnë vendin nga ku ishin dëgjuar të shtënat. Ato kanë ndërhyrë në një aheng familjar ku, pas kontrollit, kanë gjetur dhe sekuestruar një gëzhojë, dy pistoleta, një pushkë gjuetie dhe 44 fishekë të llojeve të ndryshme.
Sipas Policisë, ndaj të dyshuarit është iniciuar një rast për veprat penale “Mbajtje në pronësi ose kontroll i paautorizuar i armëve” dhe “Përdorim i armës”. Me urdhër të prokurorit të rastit, të dyshuarit i është caktuar masa e ndalimit për 48 orë.
