Barcelona njoftoi të premten rinovimin e marrëveshjes me “Spotify” si sponsor kryesor i fanellës për vitet e ardhshme, si dhe për shfaqjen e logos në uniformën stërvitore, duke zgjatur gjithashtu të drejtat e emrit të “Camp Nou”, që tani do të quhet “Spotify Camp Nou”.
Duket se marrëveshja nuk u negocia, por ishte pjesë e kushteve të mëparshme.
Më parë, ishte raportuar se Barcelona dëshironte të rinegociojë kontratën me “Spotify”, duke e konsideruar marrëveshjen aktuale të vjetëruar.
Blaugranasit kishin marrë më parë 57.5 milionë euro në vit për sponsorimin kryesor të fanellës gjatë tre viteve të fundit, plus 5 milionë euro shtesë për uniformat e stërvitjes.
Sipas “Cadena SER”, kishte shumë pak negociata, dhe të gjitha shifrat që Barcelona do të marrë deri në vitin 2030 ishin dakorduar më parë si pjesë e një klauzole për zgjatjen e kontratës me katër vite.
Marrëveshja e re hyn në fuqi në fund të këtij sezoni dhe parashikon që “Spotify” të paguajë 65 milionë euro për sponsorin kryesor të fanellës dhe 10 milionë euro shtesë për uniformën e stërvitjes.
Totali që merr Barcelona është 75 milionë euro për sezon, një rritje prej 12.5 milionë euro në sezon, ose 50 milionë euro gjithsej për periudhën e rinovuar.
Zgjatja e të drejtave të emrit për “Camp Nou” mbetet e njëjtë, por është shtrirë deri në vitin 2034.
Përfshihet klauzola që “Spotify” duhet ta tërheqë njëanshmërisht marrëveshjen në 2028 nëse stadiumi nuk operon me 90% të kapacitetit (94,500 tifozë).
Deri atëherë, Spotify do të vazhdojë të paguajë 5 milionë euro në vit, ndërsa pas përmbushjes së kushteve shifra do të rritet në 20 milionë euro për sezon.
