Një operacion policor në Podujevë ka përfunduar me gjetjen e armëve, drogës dhe pajisjeve të dyshimta, por pa arrestimin e personit që ishte në shënjestër të bastisjes.
Njësitet policore kanë ndërhyrë në një shtëpi në kërkim të një burri kosovar ndaj të cilit ishte lëshuar urdhër-arrest aktiv. Megjithatë, ai kishte arritur të largohej nga vendi para se policia ta kapte.
Gjatë kontrollit të shtëpisë, hetuesit kanë zbuluar një sasi të konsiderueshme objektesh të dyshimta: një armë të gjatë, një pistoletë, katër karikatorë, dy thika, një brisk, dy fishekë, si dhe pajisje për pastrimin e armëve. Po ashtu, është gjetur edhe një sasi prej 7.60 gramësh të një substance që dyshohet të jetë narkotike, si dhe dy mullinj për bluarje.
Prokurori i shtetit është njoftuar menjëherë për rastin, ndërsa njësitet policore kanë nisur hetimet për identifikimin dhe kapjen e të dyshuarit, si dhe për zbardhjen e plotë të ngjarjes.
Sipas raportit 24-orësh të Policisë së Kosovës, bastisja është zhvilluar më 17 tetor 2025, rreth orës 12:50, në komunën e Podujevës.
