Në një intervistë të ngarkuar me emocione dhe tone kritike, deputeti i Aleancës për Ardhmërinë e Kosovës, Daut Haradinaj, ka folur për protestat në mbështetje të ish-krerëve të UÇK-së dhe për tensionet e vazhdueshme mes kryeministrit të Kosovës, Albin Kurti, dhe homologut të tij shqiptar, Edi Rama.
I ftuar në Euronews Albania, Haradinaj nuk kurseu kritikat ndaj Kurtit, duke e akuzuar për ftohje të qëllimshme me Tiranën. “Kurti ka katër vite që nuk e ka frekuentuar Shqipërinë. E ka pak fobi Shqipërinë, pavarësisht sloganit të tij ‘bashkim kombëtar’. Vitin e kaluar ka shkuar në Greqi 27 herë, ndërsa Shqipërinë nuk e ka vizituar asnjëherë,” deklaroi ai.
Por momenti më i ndjeshëm i intervistës erdhi kur Haradinaj foli për mënyrën si ua shpjegon fëmijëve të tij Luftën e Kosovës. “Mundohem sa më pak t’i ushqej me të kaluarën, sepse detyrimisht i ushqej me urrejtje ndaj një pale tjetër. Por nuk mund t’i iki të vërtetës, pasi kam anëtarë të familjes që kanë rënë dëshmorë gjatë luftës. Që të shkoj tek familja ime, duhet të kaloj tek 100 dëshmorë që i kam tek oborri i shtëpisë.”
Haradinaj theksoi se kujtesa e luftës nuk duhet të shndërrohet në barrë, por në vlerë që e ndihmon shoqërinë të ecë përpara. “Sa më shumë merremi me të ardhmen, aq më shumë e rrisim vlerën e së kaluarës,” tha ai, duke nënvizuar se çdo familje shqiptare ka përjetuar dhunën e luftës në një formë apo tjetër – qoftë me gjak, qoftë me strehim.
Deklaratat e Haradinajt vijnë në një moment kur raportet Kosovë–Shqipëri janë të tensionuara dhe kur figura të rëndësishme të luftës po përballen me procese gjyqësore ndërkombëtare.
Në këtë kontekst, fjalët e tij rezonojnë si thirrje për reflektim, por edhe si kritikë ndaj një qasjeje politike që, sipas tij, po e zbeh lidhjen shpirtërore mes dy vendeve.
