Në Komandën e Doktrinës dhe Stërvitjes në Ferizaj (KDS) janë përmbyllur me sukses “Kursi për Staf të Betejës” dhe “Kursi për Rreshter të Drillit”, të zhvilluara nga ekipet e Organizatës për Menaxhimin e Trajnimit dhe Asistencë të Sigurisë të Ushtrisë së SHBA-ve (SATMO).
Sipas ministrit të Mbrojtjes, Ejup Maqedonci, qëllimi i Kursit të Stafit të Betejës ishte zhvillimi profesional i nënoficerëve të Forcës së Sigurisë së Kosovës (FSK) në Procesin e Vendimmarrjes Ushtarake (PVMU), përmirësimi i sinkronizimit të stafit në funksionet luftuese dhe avancimi i proceseve të komandimit dhe kontrollit në nivel batalioni e brigade.
Ndërkaq, Kursi për Rreshter të Drillit kishte për qëllim trajnim dhe përgatitje të instruktorëve të ardhshëm të FSK-së, të cilët do të jenë përgjegjës për transformimin e rekrutëve të rinj në ushtarë të disiplinuar, fizikisht të aftë dhe të përgatitur në taktika luftarake.
