Torino arriti një fitore të rëndësishme në shtëpi ndaj Napolit, duke triumfuar me rezultatin minimal 1-0. Golin vendimtar e realizoi ish-lojtari i Napolit, Giovanni Simeone, i cili i dha Torinos tre pikë të vlefshme në një ndeshje të ekuilibruar.
Skuadra e Antonio Contes e nisi më mirë ndeshjen, por pa arritur të krijojë raste të rrezikshme për gol. Torino reagoi në pjesën e parë, goditi shtyllën me Vlasic dhe pak minuta më vonë gjeti avantazhin me Simeone, që shfrytëzoi një gabim në mbrojtjen napolitane.
Në pjesën e dytë, Napoli dominoi posedimin dhe kërkoi barazimin me Spinazzolën, De Bruyne dhe Anguissën, por pa sukses. Në minutat shtesë, Lang arriti të dërgonte topin në rrjetë, por goli iu anulua për pozicion jashtë loje.
Me këtë rezultat, Napoli regjistron humbjen e dytë radhazi jashtë fushe, ndërsa Torino ngjitet në mesin e tabelës dhe konfirmon formën e mirë në shtëpi.
