Flori Paluçi, 33-vjeçari që dyshohet si autor i njërës prej vrasjeve të ndodhura mëngjesin e sotëm në Manëz të Durrësit, u qëllua më pas për vdekje nga shoku i viktimës së parë, Arianit Kurti, 23-vjeçar.
Kurti ishte ulur në një lokal bashkë me shokun e tij, Daniel Pepa, 21 vjeç, kur ky i fundit kishte kërkuar të porosiste një kafe, por që nuk iu shërbye. Në këtë moment, në debat u përfshi edhe Paluçi, i cili ndodhej në tavolinë me kamerierin.
Debati eskaloi në përleshje, ku Paluçi nxori armën dhe qëlloi mbi Kurtin, duke e lënë të vdekur në vend.
Menjëherë pas kësaj, shoku i viktimës, Pepa, reagoi duke e vrarë me armë zjarri Paluçin.
Për këtë të fundit u raportua se ka pasur një të kaluar kriminale.
Ai ishte arrestuar më herët, në vitin 2015, në Itali, si pjesë e një bande të strukturuar grabitësish që vepronte në disa qytete italiane, raporton JoqAlbania, transmeton Klankosova
Sipas mediave, grupi përbëhej nga gjashtë shtetas sicilianë dhe Paluçi si i vetmi shqiptar. Banda njihej për metodën e veçantë të grabitjeve, hapjen e vrimave në muret e bizneseve për të depërtuar brenda tyre pa u diktuar.
Hetimet ndaj grupit kishin nisur në verën e vitit 2014, pas dy grabitjeve të dhunshme në argjendaritë e Ravenna-s dhe Alfonsine-s.
Brenda një periudhe prej vetëm 20 ditësh, autorët arritën të vidhnin sende me vlerë rreth 200 mijë euro.
