Presidenti Volodymyr Zelenskiy u bëri thirrje aleatëve evropianë të enjten që të furnizojnë Ukrainën me armë me rreze të gjatë veprimi, pasi dështoi të siguronte një premtim nga Presidenti i SHBA-së Donald Trump për t’i siguruar Kievit raketa të fuqishme Tomahawk.
Zelenskiy, i cili iu drejtua udhëheqësve të Bashkimit Evropian në Bruksel, u bëri thirrje gjithashtu atyre që të bien dakord sa më shpejt të jetë e mundur për një plan për të përdorur asetet e ngrira ruse dhe tha se Kievi do të përdorte një “pjesë të konsiderueshme” të çdo fondi të vënë në dispozicion për të blerë armë të prodhuara në Evropë.
“Kur flasim për armë me rreze të gjatë veprimi për Ukrainën, nënkuptojmë se regjimi i Putinit duhet të ndiejë pasoja reale nga kjo luftë. Ju bëj thirrje të mbështesni gjithçka që e ndihmon Ukrainën të fitojë aftësi të tilla – sepse kjo bën vërtet një ndryshim për Rusinë”, tha ai.
“Shikoni sa nervoz u bë (Presidenti rus Vladimir) Putin kur u ngrit kjo temë. Ai e kupton që armët me rreze të gjatë veprimi mund ta ndryshojnë vërtet rrjedhën e luftës”.
Zelenskiy ka kërkuar raketa Tomahawk nga Shtetet e Bashkuara. Trump nuk e përjashtoi furnizimin e Kievit me raketa të tilla gjatë bisedimeve në Uashington me Zelenskiy javën e kaluar, por u duk i ftohtë ndaj kësaj ideje.
