Ajo është padyshim ndër emrat më të dashur në muzikën tonë, ku në gjithë këto vite karrierë ka ditur sesi të mbajë të afeksionuar publikun. Gjithnjë shumë e drejtpërdrejtë kur pyetet në intervistat që jep, Anxhela Peristeri nuk ngurron të tregohet e sinqertë.
Ndaj edhe në daljen e saj të fundit duhet thënë ka ngritur disa pikëpyetje të mëdha. Anxhela, e pyetur për martesën dhe dashurinë, tregoi se shumë veta duan të dinë për jetën e saj personale, ndërsa tha se edhe është tradhtuar, jo vetëm në raport bashkëshortor, por edhe nga shoqëria.
“Dikur i përjetoja disi keq kur më pyesin për martesën, por tani nuk i përjetoj fare. Shumë shqiptarë e bëjnë këtë pyetje edhe nga dashuria, jo nga dashakeqësia. Ashtu si të bëjnë përshtypje gjërat kur je 20 apo 25 vjeçe, nuk të bëjnë kur je 40”, – tha këngëtarja.
Ajo gjithashtu foli edhe për raportin e saj me dashurinë dhe shoqërinë, ku tregoi hapur se ishte tradhtuar nga të dyja palët.
“Më kanë tradhtuar. Mendojë që tradhtia vjen kur nuk je e lumtur. Ka edhe tradhti shoqërore. Shoqëria më ka tradhtuar shumë. Nuk më kanë bërë ndonjë gjëmë të madhe. Me të gjithë artistët flas. Nuk i kam prishur ndonjëherë marrëdhëniet. Edhe kur e kuptoj ‘pucin’ që po më bëhet, nuk i jap shumë rëndësi”, – u shpreh ajo.
E pyetur për dashurinë e vërtetë, Anxhela tregoi se akoma nuk e kishte gjetur atë. “Akoma nuk e kam veshur fustanin e bardhë”, – tha këngëtarja.
Por kjo deklaratë ka ngritur dyshime se lidhja e gjatë e dashurisë që këngëtarja ka pasur tashmë është mbyllur. Vetëm vitin e shkuar, ajo pranoi për herë të parë se është në një lidhje të gjatë dhe të konsoliduar dashurie, duke preferuar që të mbajë diskret identitetin e tij.
Madje në një intervistë të dhënë, artistja shprehej se gjithçka po shkonte mirë mes saj dhe të dashurit. “Nuk mbahem si njeri xheloz, këtë e kam në shoqëri, por edhe në dashuri. Nuk dua ta kem tjetrin pronë dhe t’i kushtëzoj jetën, por mendoj se është shumë e rëndësishme edhe përzgjedhja e partnerit, sepse ka partnerë që shkojnë mirë me njëritjetrin, por ka edhe partnerë që nuk përshtaten me njëri-tjetrin dhe historia shkon keq, arrijnë në problematika të tjera. Mendoj se përzgjedhja është shumë e rëndësishme, duke qenë se artisti ka një jetë shumë ndryshe nga të tjerët. Artisti ka një jetë më aktive, më pak të përballueshme nga mentaliteti shqiptar, kështu që përzgjedhja e partnerin për ne është shumë e rëndësishme, por edhe e vështirë. Ndaj edhe mendoj se është fat i madh kur partneri të kupton”, – shprehej Anxhela.
Por në daljen e saj të fundit, ajo rrëfeu se nuk e kishte gjetur ende dashurinë, duke lënë të kuptohet që ndoshta ky raport kaq i rëndësishëm për të ishte mbyllur, ashtu edhe si u nis, pa shumë bujë.
