Një tërmet me magnitudë 6.1 ka goditur lagjen Sındırgı të Balıkesirit në Turqi, mbrëmjen e së hënës, duke shkaktuar dëme të konsiderueshme në infrastrukturë.
Sipas të dhënave të AFAD-it, lëkundja ndodhi në orën 22:48 në një thellësi prej rreth 5.9 kilometrash dhe u ndje gjerësisht në rajonet Marmara dhe Egje.
Provincat e prekura përfshijnë Balıkesir, Izmir, Bursa, Stamboll, Tekirdağ, Kocaeli dhe Sakarya. Mediat turke raportojnë se me zbardhjen e ditës, pasojat e tërmetit u bënë më të dukshme: tre ndërtesa janë shembur plotësisht, ndërsa shumë të tjera kanë pësuar dëmtime të rënda.
Ekipet e shpëtimit vijojnë kërkimet nën rrënoja, ndërkohë që deri më tani nuk është raportuar për viktima. Autoritetet janë në gatishmëri për të ndihmuar banorët dhe për të vlerësuar dëmet materiale.
