Kryetari i Bashkësisë Islame në Kaçanik, Fidaim Fazliu, ka pritur sot në takim Komandantin e KFOR-it për Rajonin e Pejës, Kolonel Lorenzo Mangia.
Lajmin e ka bërë të ditur vetë Këshilli i Bashkësisë Islame të Kaçanikut përmes një postimi në faqen zyrtare në Facebook.
Gjatë takimit, Koloneli Mangia është informuar për komunën e Kaçanikut, për jetën fetare që zhvillohet në këtë komunë, si dhe për raportet e mira e bashkëpunimin e ngushtë që Bashkësia Islame e Kaçanikut ka me institucionet lokale dhe ato qendrore.
Nga ana e tij, Komandanti i KFOR-it italian foli për aktivitetet dhe angazhimet e vazhdueshme të trupave ndërkombëtare në mbështetje të sigurisë dhe mirëqenies së qytetarëve të Kosovës.
Kryetari Fazliu ka shprehur mirënjohjen e tij për kontributin e çmuar që KFOR-i ka dhënë dhe vazhdon të japë në ruajtjen e paqes, stabilitetit dhe sigurisë në vend. Ai ka theksuar se populli i Kosovës ka respekt dhe konsideratë të jashtëzakonshme për misionin e KFOR-it dhe për rolin që ai luan në ruajtjen e rendit dhe sigurisë.
Në fund të takimit, në shenjë respekti dhe miqësie, Kolonel Mangia i ka dhuruar Kryetarit Fazliu një pikturë simbolike me vlerë të veçantë.
