Ehat Miftaraj nga Instituti i Kosovës për Drejtësi ka ironizuar me qëndrimin e presidentes Vjosa Osmani në Arabinë Sadudite në një kohë kur partitë po presin ftesën e saj për konsultime, pasi kryetari i LVV-së, Albin Kurti të dielën dështoi ta krijonte një shumicë të re parlamentare për zgjedhjen e qeverisë së re.
Osmani njoftoi sot për një takim me presidentin e Bullgarisë Rumen Radev në Riad dhe tregoi se “në qendër të bisedës ishin largimi i masave të padrejta ndaj Kosovës”.
Miftaraj, ndërkaq, shkroi se si Osmani duhej të kthehej në Kosovë dhe t’i ftonte partitë politike parlamentare në konsultim për zgjedhjen e qeverisë së re apo shpalljen e zgjedhjeve të reja.
“Presidentja Osmani: z. Radev ndonjë fjalë të mirë në Bruksel me na i hjek sanksionet. Presidenti Radev: O na flasim, po tybe kush sna degjon. Po ti ne Kosove lirisht perdore kete diskutim qysh te pershtatet ty. Presidente kthehu ne Kosove, cakto takimin me lidere politik dhe pyeti a I kane a si kane votat. Nuk i kane votat, shpalli zgjedhjet. Pastaj kthehu prape ne Riad e rri sa te duash”, shkroi ai në një postim në Facebook.
Osmani nuk i ka ftuar ende partitë politike për konsultime. Bekim Kupina, këshilltar për media i presidentes, i tha Gazetës Express të dielën se ajo do ta bëjë këtë “gjithsesi brenda afatit kushtetues dhe në përputhje me përgjegjësitë kushtetuese”.
