Mbi dy dekada zgjati beteja ligjore me shtetin britanik.
Shqiptari, Gentian Hoti, ia doli ta fitojë leje-qëndrimin në Britaninë e Madhe pas 26 vjetësh.
Ai mbërriti atje me një emër të rremë, shkruajnë mediat shqiptare .
41 vjeçari kishte deklaruar asokohe se ishte një vit më i ri dhe se kishte lindur në Kosovë.
Çështja e Hotit, njihet si ndër historitë më të gjata të emigracionit në Mbretërinë e Bashkuar.
Fillimisht, atij iu hoq nënshtetësia në vitin 2019-të, pasi Sekretari i Shtetit zbuloi se ai kishte përdorur një “identitet të rremë”.
Shteti konstatoi se Hoti duhet të mbante përgjegjësi, për përdorimin e një identiteti të rremë kur ishte i mitur, ai kishte “synuar të mashtronte” Ministrinë e Brendshme në aplikimet e tij më pas.
Tani, pas saktësisht 26 vjetësh, 41 vjeçari fitoi të drejtën për t’u bërë shtetas britanik.
Gentian Hoti, mbërriti në Mbretërinë e Bashkuar si adoleshent në vitin 1999 përpara se të kërkonte azil nën një “identitet të supozuar” në të cilin tha se kishte lindur në vitin 1985 dhe jo në vitin 1984, që ishte viti i tij i saktë i lindjes.
Ai gjithashtu tha në mënyrë të rreme se asokohe ishte shtetas i Republikës Federale të Jugosllavisë.
Në një pyetësor të plotësuar në tetor 1999, një muaj pasi ai mbërriti në Mbretërinë e Bashkuar, u deklarua se Hoti kishte “vuajtur në duart e autoriteteve jugosllave të dominuara nga serbët në Kosovë”.
Thuhej se familja e zotit Hoti, si pasojë, kishte bërë përgatitjet që familja e tyre të largohej nga Kosova dhe se adoleshenti kishte humbur kontaktet me ta ndërsa ata kalonin kufirin që lidh Kosovën me Malin e Zi.
Në nëntor të atij viti, Sekretari i Shtetit refuzoi kërkesën e Hotit për mbrojtje ndërkombëtare, por i dha atij leje të jashtëzakonshme qëndrimi deri në nëntor 2003.
Adoleshenti u vendos më pas në kujdesin e autoriteteve lokale. Në tetor 2003, Hoti aplikoi për leje qëndrimi të pacaktuar, e cila iu dha vitin më pas.
“Në këtë datë, z. Hoti ishte ende 18 vjeç me identitetin e tij të rremë dhe 19 vjeç me identitetin e tij të vërtetë”, thuhej në vendim.
Në vitin 2005, Hoti aplikoi për t’u natyralizuar si shtetas britanik. Kërkesa e tij u miratua atë vit. Por, rreth pesë vjet më vonë, në vitin 2010, zyra e Sekretarit të Shtetit i dërgoi Hotit një letër hetimi në lidhje me shtetësinë e tij britanike.
Në shkurt 2013, atij iu dërgua një njoftim vendimi duke e njoftuar se “natyralizimi i tij si shtetas britanik ishte i pavlefshëm”.
Pati komunikime të mëtejshme mbi statusin e tij si shtetas britanik gjatë viteve në vijim.
Në qershor 2019, Sekretari i Shtetit lëshoi një njoftim vendimi për ta privuar Hotin nga shtetësia britanike. Ata kishin vërejtur se “në çdo kërkesë të bërë Sekretarit të Shtetit që nga mbërritja e tij në Mbretërinë e Bashkuar, Hoti kishte pohuar ose lënë të pakorrigjuar se kishte lindur në vitin 1985 dhe se ishte shtetas kosovar”.
Hoti e apeloi vendimin në vitin 2019 dhe çështja u dëgjua para një gjyqtari në vitin 2020, i cili e pranoi ankesën. Sekretari i Shtetit e apeloi këtë vendim në Gjykatën e Lartë, ku u vendos që çështja të dëgjohej nga e para.
Një gjyqtar i gjykatës së shkallës së parë e trajtoi çështjen dhe zbuloi se që nga kërkesa e tij për shqyrtim gjyqësor në vitin 2013, Hoti nuk kishte dhe vazhdoi të mos pohonte se kishte lindur në Kosovë. Që nga ajo kohë, ai ka pranuar se kishte lindur në Shqipëri, thuhej në vendim.
Gjyqtari e pranoi ankesën e Hotit sipas Aktit të Shtetësisë Britanike të vitit 1981.
Pas një sërë kundër-ankesash nga Ministria e Brendshme, një gjykatë e lartë vendosi më në fund në favor të tij, duke i dhënë atij të drejtën për të qenë shtetas britanik.
