Deputeti i Lidhjes Demokratike të Kosovës (LDK), Anton Quni, ka reaguar pas deklaratave të gazetarit Berat Buzhala, të bëra gjatë një emisioni në televizionin T7, ku u diskutua mundësia që disa deputetë të LDK-së të votojnë për Qeverinë “Kurti 3”.
Në atë emision, Buzhala kishte përmendur emrin e Qunit si një nga deputetët e mundshëm që do ta mbështesnin qeverinë e ardhshme, duke vepruar, sipas tij, jashtë qëndrimit zyrtar të partisë.
Në reagimin e tij publik, Quni e ka mohuar kategorikisht një gjë të tillë, duke theksuar se qëndrimi i tij politik mbetet plotësisht i përputhur me vendimet e strukturave të LDK-së.
“Nuk e di nëse deklarimi i z. Berat Buzhala ishte i pamenduar mirë apo me ndonjë qëllim të caktuar. Sidoqoftë, dua të jem shumë i qartë: në asnjë rrethanë dhe në asnjë kusht, unë, Anton Quni, nuk do të ndryshoj anë, e as nuk do të votoj në të kundërtën e vendimit të Kryesisë së LDK-së”, ka deklaruar deputeti.
Ai ka theksuar se qëndrimi i tij ndaj partisë është i palëkundur dhe se nuk ka asnjë dilemë për përkatësinë e tij politike.
“Qëndrimi im është dhe mbetet i palëkundur, në përputhje të plotë me vendimmarrjen e strukturave të partisë sime. Një herë LDK, gjithmonë LDK!”, ka përfunduar Quni.
