Shfaqja e një droni pranë aeroportit të Bremenit shkaktoi ndërprerje të fluturimeve për rreth një orë të dielën në mbrëmje. Sipas policisë, nuk ishte e mundur të identifikohej origjina ose operatori i dronit.
Trafiku ajror në aeroportin gjerman u ndërpre nga ora 20:30 deri në 21:22, teksa një dron u pa duke fluturuar në një zonë ngjitur me aeroportin. Kontrolli i trafikut ajror pezulloi menjëherë të gjitha ngritjet dhe uljet, duke rezultuar në vonesën e të paktën një fluturimi dhe devijimin e një tjetri, i cili përfundimisht u ul në aeroportin e Hamburgut.
Disa ditë më parë, të gjitha fluturimet në Aeroportin e Berlinit u pezulluan për dy orë për shkak të zbulimit të një droni në zonë. Muajin e kaluar, dy incidente të ngjashme u regjistruan në Mynih, të cilat shkaktuan kaos për orë të tëra në aeroportin e dytë më të madh të Gjermanisë.
Pas Mynihut e Berlinit, dronët “paralizojnë” edhe aeroportin
Dronët përbëjnë një rrezik të konsiderueshëm sigurie, veçanërisht pranë aeroporteve, dhe në Gjermani ato janë të ndaluara brenda një rrezeje prej 1.5 kilometrash prej tyre, pasi mund të rrezikojnë ngritjet dhe uljet.
Incidentet me zbulimin e dronëve pranë aeroporteve gjermane janë bërë veçanërisht të shpeshta kohët e fundit, dhe qeveria gjermane njoftoi krijimin e një qendre të posaçme koordinimi për t’u marrë me to, ndërsa tani autorizon policinë t’i rrëzojë ato nëse është e nevojshme.
