Kryetari i LDK’së, Lumir Abdixhiku, ka thënë se propozimi i partisë së tij të bërë muaj më parë për krijimin e një Qeverie të Unitetit Kombëtar, ishte refuzuar për t’u krijuar tash një Qeveri e Pakicës.
Ai shtoi se propozimi i tij ishte i ndërtuar mbi idenë e përgjegjësisë së përbashkët dhe bashkërendimit shtetëror, kurse propozimi i Glauk Konjufcës si mandatar i qeverisë, është humbje kohe.
“Fatkeqësisht, ky propozim u refuzua me shpejtësi dhe me furi. Në vend të bashkëpunimit, u zgjodh vazhdimi i krizës, me seanca të pakuptimta, me shkelje kushtetuese dhe me një mungesë të plotë përgjegjësie institucionale”, ka thënë Abdixhiku.
“Dhe në gjendje të tillë, në fund të këtij cikli, që më shumë i ngjanë një cirku politik, pra në fund të bllokadës tetë mujore, Kosovës, qytetarëve tanë po i propozohet si “zgjidhje” një Qeveri e Pakicës, për periudhë kalimtare, me pretendimin për të trajtuar çështje shtetërore”, ka thënë i pari i LDK-së.
Abdxhiku ka thënë se qeveri të pakicës nuk ka më në Kosovë.
“Nga viti 1999, në Kosovë vendosë shumica”, ka thënë Abdixhiku.
