Kompania “NewCo Ferronikeli Complex L.L.C.”, përmes një komunikate për media, ka njoftuar se për shkak të ndaljes së gjatë të aktiviteteve prodhuese dhe kushteve të vështira të tregut, që vazhdojnë të ndikojnë në shitjet dhe fitimet, do të zbatojë një plan ristrukturimi të fuqisë punëtore si pjesë e përpjekjeve më të gjera për të siguruar stabilitet financiar dhe operativ në planin afatgjatë.
Kompania njofton se ky vendim po merret pas më shumë se dy vjetësh tejet të vështirë për të mbajtur operacionet dhe për të ruajtur të gjitha vendet e punës që nga ndalimi i plotë i prodhimit në tetor 2023.
“Gjatë kësaj periudhe, kostot fikse operative, pagat dhe mirëmbajtja e kompleksit janë financuar plotësisht nga kompania pronare”, thuhet në komunikatë.
Një nga arsyet kryesore për këtë situatë është edhe rritja e çmimit të energjisë elektrike.
“Gjatë 24 muajve të fundit, NewCo Ferronikeli ka ndjekur nga afër luhatjet në tregjet globale të metaleve dhe rritjen e ndjeshme të çmimeve të energjisë elektrike në Evropë – faktorë të jashtëm që kanë rritur ndjeshëm kostot e prodhimit dhe kanë dëmtuar qëndrueshmërinë financiare”, thekson komunikata.
Për këtë arsye, kompania ka vendosur të redukojë stafin e punëtorëve, për shkak të pamundësisë financiare për t’i paguar.
“Pavarësisht angazhimeve serioze për uljen e kostove, operacioneve të reduktuara, orëve të shkurtuara të punës dhe mbajtjes së furrës kryesore në gjendje të ngrohtë, mungesa e vazhdueshme e të ardhurave e ka bërë gjendjen financiare të paqëndrueshme.
Pas një vlerësimi tepër të kujdesshëm, menaxhmenti ka vendosur se mbajtja e fuqisë punëtore aktuale pa prodhim është bërë e pamundur. Prandaj, kompania nuk ka alternativë tjetër përveçse të vazhdojë me largimin kolektiv, në përputhje të plotë me Ligjin e Punës.
Të gjithë punonjësit e prekur do të marrin të drejtat e tyre ligjore deri në datën e ndërprerjes, dhe njoftimet individuale do të lëshohen sipas procedurave ligjore. Kompania mbetet e përkushtuar për një proces të drejtë, transparent dhe me respekt ndaj secilit punonjës”, thuhet në komunikatë.
“NewCo Ferronikeli mbetet thellësisht e përkushtuar ndaj Kosovës dhe njerëzve të saj. Sapo kushtet e tregut të lejojnë rifillimin e prodhimit, punonjësit e prekur do të kenë prioritet për ripunësim. Një numër i kufizuar personeli thelbësor do të mbetet për të siguruar integritetin e kompanisë, për të menaxhuar licencat minerare dhe për të përmbushur detyrimet ligjore.
Pavarësisht sfidave aktuale, NewCo Ferronikeli mbetet e bindur në potencialin afatgjatë të prodhimit të nikelit dhe është e vendosur të rikthejë operacionet e plota sapo të rikthehet stabiliteti i tregut”, përfundon komunikata.
