Kancelari gjerman, Friedrich Merz ka ftuar ministra, përfaqësues landesh, nga industria e sindikatat në një samit për çelikun në Berlin. Synimi ruajtja e prodhimit të çelikut në Gjermani.
Kandelari gjerman fton në Zyrën e Kancelarisë për të nxjerrë nga kriza industrinë e çelikut në një samit të çelikut. “Qëllimi,” njoftoi së fundmi kancelari Friedrich Merz (CDU), “është të ruhet prodhimi i çelikut në Gjermani në planin afatgjatë”. Ky është konsensus i padiskutueshëm jo vetëm brenda koalicionit, por edhe opozita në Bundestag, sindikatat dhe industria e kërkojnë këtë.
Ruajtja e vendeve të punës ka pritoritet. Sipas Federatës Gjermane të Çelikut, rreth 80.000 njerëz ende punojnë në industrinë gjermane të çelikut. Por edhe vazhdimit i prodhimit të çelikut në Gjermani ka rëndësi, qoftë për sektorin e ndërtimit, industrinë e automobilave apo industrinë e mbrojtjes. Sidomos në kohë krize, varësia e tepërt nga importet e çelikut do të përbënte një rrezik për ekonominë gjermane, thuhet.
“Presioni është shumë i madh”
Pavarësisht konsensusit për mbajtjen e industrisë së çelikut në Gjermani, sektori është në krizë. Jürgen Kerner, kryetari i dytë i sindikatës IG Metall, thotë se nëse presioni ka qenë i lartë “gjatë 20 viteve të fundit”, tani “presioni është i jashtëzakonshëm”.
Çmimet e larta të energjisë, rënia e kërkesës, për shembull në industrinë e automobilave, importet e lira të çelikut, veçanërisht nga Kina, tarifat amerikane dhe tranzicioni i vështirë drejt prodhimit të çelikut më miqësor ndaj klimës – të gjitha këto po ndikojnë negativisht në industrinë e çelikut. Jürgen Kerner i tha studios së ARD në Berlin se tani nevojiten “rezultate të shpejta”, qoftë në lidhje me mbrojtjen tregtare apo kostot e energjisë elektrike industriale. Përndryshe, paralajmëroi ai, “industria e çelikut në Gjermani do të pësojë kolaps, jam absolutisht i bindur për këtë”.
Të paktën për çështjen e çmimeve të energjisë ka lëvizje. Këtë javë, Ministrja e Ekonomisë Katherina Reiche (CDU) njoftoi se negociatat me Komisionin Evropian janë në fazat e tyre përfundimtare. Ajo tha, se “pret që ne të prezantojmë çmimin e energjisë elektrike industriale më 1 janar 2026”. Kjo do të siguronte energji elektrike të subvencionuar për kompanitë veçanërisht që konsumojnë shumë energji, ku industria e çelikut është ndër përfitueset. Megjithatë, qeveria federale nuk ka publikuar detaje të mëtejshme. Përveç kësaj BE do të kufizojë importet e çelikut në Europë edhe me dogana të larta për të mbrojtur indnustrinë. Synimi është ulja e importeve të lira nga Kina. Qeveria gjermane nuk ka vendosur ende nëse i mbështet planet.
Përpara samitit të çelikut u theksua nevoja për vendime konkrete, jo vetëm për foto me efekt mediatik. Megjithatë, qeveria gjermane i ka zbutur disi pritjet. Zëvendëszëdhënësi i qeverisë Steffen Meyer e quajti samitin e kësaj jave një “samit që hap udhën”. Ai shpjegoi se takimi do të hapë vërtet rrugën për hapa të mëtejshëm “që ne planifikojmë të ndërmarrim për të forcuar këtë industri strategjikisht të rëndësishme këtu në Gjermani, për ta forcuar atë në Evropë dhe për të mbrojtur vendet e punës”. /DW
