Anëtarët e Agjencisë së Sigurisë dhe Informacionit në Serbi, që njihet me shkurtesën BIA, në bashkëpunim me organe të tjera shtetërore në zonën e Rashkës, raportohet se kanë arrestuar të premten dy persona nga strukturat e sigurisë me dyshimin për spiunazh, raportuan mediat pro-regjimit, shkruan N1.
Sipas raportimit të medias së pavarur serbe N1, disa media publikuan lajme identike në lidhje me aksionin e BIA-s dhe arrestimin e dy personave nga strukturat e sigurisë me dyshimin për spiunazh.
Sipas raportit, dyshohet se të ndaluarit kishin mbledhur informacione konfidenciale me rëndësi për sigurinë e Serbisë për një periudhë të gjatë kohore dhe ua kishin kaluar ato shërbimeve të inteligjencës shqiptare.
“Hetimi zgjati disa muaj dhe arrestimi është vazhdim i aksionit nga 1 nëntori, kur Millan Vukashinoviq u arrestua në kufi”, thuhet në lajmin e publikuar nga mediat pro-regjimit në Serbi.
Shtohet se Vukashinoviq u përpoq të arratisej në atë rast, por shërbimet serbe të sigurisë përdorën armë zjarri dhe ai u plagos.
“Atij iu dha menjëherë ndihmë mjekësore në vend, u transportua në Spitalin Qendror të Nishit për trajtim dhe ndalim e paraburgim të caktuar”, përfundon raporti.
N1 raporton se vitin e kaluar, mediat pro-regjimit e shënjestruan Vukashinoviqin si spiun të Albin Kurtit.
Ndërkohë, nga institucionet kosovare të sigurisë u tha se xhandarmëria serbe në rastin e plagosjes dhe kidnapimit të Vukashinoviqit, kanë hyrë brenda territorit të Kosovës.
