Ish-zëvendësministri i Ministrisë së Pushtetit Lokal, Bajram Gecaj, ka reaguar me tone të ashpra ndaj deklaratës së kryeministrit Albin Kurti, i cili e kishte quajtur kryetarin e Pejës, Gazmend Muhaxheri, “Muhaxher me sherr”.
Në reagimin e tij publik, Gecaj ka ironizuar ashpër fjalorin e Kurtit, duke thënë se “sherri” nuk vjen nga Peja, por nga Sukobina – fshati nga i cili është me origjinë kryeministri Kurti.
“Ky ‘djali’ nga Sukobina – që për fat të keq, nga Mali i Zi s’na solli as diell, as det, por vetëm re, sherr e përçarje – paska marrë guximin ta quajë Kryetarin legjendar të Pejës, Gazmend Muhaxherin: ‘Muhaxher me sherr’,” – shkruan Gecaj.
Sipas tij, ironia e kësaj deklarate është e thellë, pasi – siç shprehet ai – “njeriu flet atë që ka brenda”. Gecaj akuzon Kurtin se është vetë burimi i përçarjes dhe se çdo kritikë e tij ndaj të tjerëve në fakt është pasqyrim i vetvetes.
“E dimë mirë: njeriu flet atë që ka brenda. E kur sherri të del nga çdo fjali, s’është më ‘kritikë politike’ – është diagnozë, madje kronike,” – ka shtuar Gecaj, duke e cilësuar Kurtin si “kryeministër që nuk di të ndërtojë as ura, as bashkëpunim, por vetëm grindje e përçarje”.
Në anën tjetër, Gecaj e ka lavdëruar punën e kryetarit të Pejës, Gazmend Muhaxheri, të cilin e ka cilësuar si simbol të zhvillimit dhe qytetarisë.
“Gazmend Muhaxheri për katër mandate rresht ka bërë atë që disa s’e bëjnë as për katër jetë: rrugë moderne, shkolla të reja, turizëm që lulëzon, kulturë që gjallëron dhe, mbi të gjitha, transparencë që ndriçon.
Po, ai ka ‘sherr’: sherr me punën, me projektet, me zhvillimin! Nëse ky është sherr, atëherë le të na bie sa më shumë,” – ka theksuar Gecaj.
Ai ka përfunduar reagimin e tij duke thënë se ndërsa disa merren me fjalë dhe akuza, Muhaxheri merret me realitet, punë dhe qytetarë, duke e cilësuar atë “kapitull të artë të historisë moderne të Pejës”.
“Gazmend Muhaxheri – simbol i zhvillimit, qytetarisë dhe integritetit,” – përfundon reagimin e Bajram Gecajt.
