Partia Demokratike e Kosovës ka kundërshtuar ashpër vendimin e Panelit Zgjedhor për Ankesa dhe Parashtresa (PZAP), i cili refuzoi kërkesën e saj për rivotim në Mitrovicën e Jugut. PDK e cilësoi vendimin si të padrejtë dhe të pajustifikuar, duke thënë se nuk pasqyron situatën e raportuar gjatë procesit zgjedhor.
Në reagimin zyrtar, partia shprehet se është “thellësisht e zhgënjyer” me epilogun e PZAP-së, duke theksuar se ka dorëzuar prova dhe dëshmi që, sipas saj, tregojnë qartë cenimin e procesit dhe mosrespektimin e vullnetit të qytetarëve. Sipas PDK-së, të gjitha këto elemente duhej të mjaftonin për të urdhëruar rivotim në këtë komunë.
Partia njofton se do të vijojë betejën ligjore, duke paralajmëruar se hapi i radhës do të jetë dërgimi i ankesës në Gjykatën Supreme. Kjo instancë mbetet e fundit që mund të vendosë për integritetin e procesit zgjedhor dhe për kërkesën e PDK-së për përsëritjen e votimit.
“Jemi dhe mbetemi në mbrojtje të votës së lirë dhe të pastër. Nuk kërkojmë asgjë më shumë sesa respektimin e ligjit dhe të vullnetit të mitrovicasve,” thuhet në reagim. PDK shton se do ta çojë çështjen deri në fund, duke shprehur bindjen se “drejtësia do të vijë”.
