Paneli Zgjedhor për Ankesa dhe Parashtresa (PZAP) ka refuzuar zyrtarisht ankesën e Partisë Demokratike të Kosovës (PDK) lidhur me rezultatin e zgjedhjeve lokale në Mitrovicën e Jugut, duke konfirmuar se nuk ka bazë ligjore për përsëritjen e votimit në këtë komunë.
Në vendimin e publikuar, PZAP thekson se kërkesa e PDK-së për rivotim është e pabazuar, duke nënvizuar se pretendimet e ngritura nga subjekti politik nuk janë mbështetur me prova të mjaftueshme që do të justifikonin anulimin e procesit zgjedhor.
“Refuzohet e pabazuar ankesa e subjektit politik PDK… me të cilën është kërkuar që Komisioni Qendror i Zgjedhjeve të përsërisë procesin zgjedhor në Komunën e Mitrovicës së Jugut”, thuhet në vendimin e Panelit.
Një pikë e veçantë e ankesës së PDK-së kishte të bënte me dyshimet për të ashtuquajturin “tren bullgar”, një formë e manipulimit zgjedhor ku pretendohen votime të organizuara në seri. Por sipas PZAP-së, ky pretendim nuk qëndron, pasi gjatë shqyrtimit të materialeve zgjedhore dhe raportimeve zyrtare nuk janë gjetur indikacione që sugjerojnë skemë të tillë.
Me këtë vendim, rezultati i zgjedhjeve në Mitrovicën e Jugut mbetet i pakontestuar në instancën e PZAP-së, ndërsa PDK ka të drejtë t’i drejtohet Gjykatës Supreme nëse dëshiron të vazhdojë betejën ligjore.
