Presidenti amerikan Donald Trump ka kërkuar heqjen e licencave të transmetimit për stacionet lokale të lidhura me ABC, pasi u irritua nga një pyetje mbi skandalin Epstein. Ai akuzoi rrjetin për “lajme të rreme” dhe i kërkoi kreut të FCC të shqyrtojë masat. Komisioni federal e ka hedhur poshtë mundësinë, duke thënë se nuk ka autoritet të ndëshkojë mediat për mbulimin e lajmeve.
Gjatë një deklarate për mediat, Trump kritikoi ashpër rrjetin ABC, duke e akuzuar për “lajme të rreme” dhe duke thënë se licencat e përdorura nga stacionet e tij duhet t’u hiqen. Komentet erdhën pasi një reporter i ABC-së e pyeti për çështjen Epstein në praninë e princit të kurorës saudite.
Presidenti vuri në shënjestër edhe kreun e Komisionit Federal të Komunikimeve, Brendan Carr, të cilin e ka emëruar vetë në krye të agjencisë. Ai i kërkoi Carr-it “ta shikojë nga afër” heqjen e licencave. Carr dhe Trump u takuan gjatë fundjavës në Florida.
Është hera e dytë në pak muaj që Trump sulmon ABC-në. Në shtator, ai kritikoi rrjetin pas komenteve satirike të Jimmy Kimmel dhe kërkoi sërish që licencat e transmetimit të rrjetit të revokohen.
Trump ka bërë thirrje të ngjashme edhe për NBC-në, duke kërkuar që FCC të ndërhyjë për shkak të përmbajtjes editoriale të lajmeve dhe emisioneve.
Por Komisioni Federal i Komunikimeve është distancuar nga këto kërkesa. Komisionerja demokrate Anna Gomez deklaroi se FCC “nuk ka as autoritetin, as të drejtën kushtetuese” të ndëshkojë gazetarët për mënyrën si mbulojnë politikanët, duke i cilësuar kërcënimet si “të pabaza”.
Sipas rregullave, FCC lëshon licenca 8-vjeçare për stacionet lokale dhe prej më shumë se 40 vitesh nuk ka revokuar asnjë licencë në bazë të përmbajtjes editoriale.
Ditët e fundit, Trump ka sulmuar edhe emisionet satirike të NBC-së, duke kërkuar largimin e prezantuesit Seth Meyers. Ai ka kritikuar gjithashtu CBS pas një konflikti ligjor lidhur me intervistën e montuar me Kamala Harris në “60 Minutes”.
Përplasja e re mes Trump dhe mediave pritet të shtojë tensionet mes Shtëpisë së Bardhë dhe rrjeteve kryesore televizive, në një klimë politike gjithnjë e më të polarizuar në SHBA.
