Pas shpërndarjes së Kuvendit dhe caktimit të zgjedhjeve të jashtëzakonshme për 28 dhjetor, debati politik në vend vijon të jetë i nxehtë. Dështimi për të formuar institucionet brenda afateve kushtetuese dhe dy votimet e pasuksesshme për zgjedhjen e kryeministrit e lanë Kosovën në një ngërç të thellë institucional, duke hapur rrugën për rikthimin e qytetarëve në votime.
Në këtë situatë të tensionuar, ish-ambasadori holandez në Kosovë, Robert Bosch, ka reaguar duke vënë theksin te përgjegjësia e klasës politike. Në një prononcim për Front Online, ai ka shprehur zhgënjimin e tij për mungesën e kompromisit mes partive, të cilën e konsideron shkakun kryesor të krizës së tanishme.
Sipas Bosch, interesat partiake kanë dominuar mbi ato shtetërore, duke e futur vendin në një spirale paqartësie. “Mesazhi im ka qenë gjithmonë i qartë: bëni kompromis dhe vendosni interesin e vendit mbi atë të partisë. Sidomos buxheti duhej të ishte miratuar,” u shpreh ai.
Mosmarrëveshjet e thella mes blloqeve parlamentare dhe mungesa e një shumice të qëndrueshme çuan në pamundësinë e formimit të qeverisë së re. Situata u përkeqësua edhe më shumë nga dështimi në votimin e kandidatit për kryeministër, duke e lënë vendin pa qeveri funksionale dhe pa buxhet të miratuar.
Me vendimin për zgjedhje të reja, përgjegjësia për të zhbllokuar situatën tashmë kalon tek qytetarët, ndërsa thirrja e Bosch mbetet e qartë: kompromisi dhe përgjegjësia politike janë të domosdoshme që vendi të ecë përpara.
