Kryeqyteti i Kosovës po përballet me një krizë të paprecedentë në sektorin e transportit publik, teksa mungesa e buxhetit ka futur Prishtinën në një bllokadë të plotë institucionale dhe funksionale. Të dyja shtyllat kryesore të transportit urban – Trafiku Urban dhe kompanitë private – po paralajmërojnë ndërprerje të shërbimeve, duke e lënë qytetin në prag të një kolapsi të vërtetë.
Ndërmarrja Publike Komunale “Trafiku Urban” ka njoftuar se nga java e ardhshme mund të ndalojë të gjitha linjat, pas pamundësisë për të mbuluar shpenzimet bazë operative si pasojë e bllokimit të mjeteve buxhetore. Sipas njoftimit, Qeveria e Kosovës dhe Ministria e Financave nuk kanë liruar fondet e nevojshme për Komunën e Prishtinës, duke e lënë ndërmarrjen pa pagesa që nga muaji korrik. Kjo situatë, sipas menaxhmentit, rrezikon transportin e rreth 60 mijë udhëtarëve në ditë.
Probleme edhe më të rënda janë shfaqur në sektorin privat. Linja 3A ka njoftuar se tashmë është detyruar të ndalojë qarkullimin, duke sinjalizuar një krizë të thellë financiare që ka prekur furnizimin me naftë, mirëmbajtjen dhe pagat e punëtorëve. Shoqata e Transportit “Uni Trans”, që përfaqëson të gjitha linjat private, ka konfirmuar se të hënën, më 24 nëntor, në orën 09:00, kompanitë do të protestojnë para Komunës së Prishtinës dhe nuk do të ofrojnë asnjë shërbim gjatë gjithë ditës.
“Gjashtë muaj pa pagesa” është arsyeja kryesore e revoltës së operatorëve privatë, të cilët paralajmërojnë pasoja të rënda për qytetarët, nëse situata nuk zgjidhet urgjentisht.
Bllokada financiare ka shtyrë edhe kryetarin e Prishtinës, Përparim Rama, të ndërmarrë masa ligjore, duke deponuar kallëzim penal ndaj Ministrit të Financave, Hekuran Murati. Ndërkohë, jo vetëm transporti, por edhe ndërmarrje të tjera komunale po raportojnë vështirësi të theksuara, duke ngritur frikën se kryeqyteti mund të zhytet edhe më tej në kaos, sidomos në një periudhë të tensionuar politike, me zgjedhjet që pritet të mbahen më 28 dhjetor.
Krizat e njëpasnjëshme sinjalizojnë se paralajmërimet për paralizim të qytetit nuk janë më skenarë të largët, por realitet që po afrohet me shpejtësi.
