Gjykata Supreme e Kosovës ka rrëzuar vendimin e Gjykatës së Apelit dhe ka vendosur në favor të paditësit K.J., duke i njohur atij të drejtën për pensionin personal të veteranit të UÇK-së. Sipas njoftimit zyrtar, kjo e drejtë i rikthehet nga data e ndërprerjes së saj, më 28 qershor 2021, dhe do të vazhdojë derisa të plotësohen kushtet ligjore për përfitim.
Në arsyetimin e saj, Gjykata Supreme bën të ditur se ka aprovuar si të bazuar revizionin e paraqitur nga paditësi përmes Agjencisë për Ndihmë Juridike Falas, duke ndryshuar në tërësi vendimin e Apelit. Më herët, Ministria e Financave, Punës dhe Transfereve kishte refuzuar kërkesën e K.J.-së për njohjen e pensionit të veteranit, vendim që ishte lënë në fuqi edhe nga gjykatat më të ulëta.
Aktgjykimi i Apelit i datës 10 mars 2025 kishte mbështetur qëndrimin e Ministrisë, por pas paraqitjes së revizionit, Gjykata Supreme ka vlerësuar se paditësi ka plotësuar kushtet ligjore për të përfituar pensionin e veteranit luftëtar.
