Kryetari i Partisë Demokratike të Kosovës, Bedri Hamza, ka njoftuar për një takim me Ramiz Lladrovcin, ku ka theksuar se kryetari i Komunës së Drenasit “ka qenë, është dhe mbetet PDK”.
Në postimin e tij, Hamza ka deklaruar se gjatë bisedës me Lladrovcin është ritheksuar uniteti i partisë dhe mbështetja e ndërsjellë në prag të zgjedhjeve të 28 dhjetorit. Sipas tij, Drenasi mbetet një ndër bastionet tradicionale të PDK-së, duke vijuar, siç u shpreh ai, vizionin e “heronjve të luftës dhe paqes”.
Hamza vlerësoi qeverisjen lokale në këtë komunë dhe tha se energjia e strukturave të PDK-së dhe fryma e trashëgimisë së UÇK-së do të jenë përcaktuese për fitoren e partisë në zgjedhjet e ardhshme.
“Energjitë e bastionit të UÇK-së dhe PDK-së, në Drenasin e dëshmorëve dhe martirëve, me qeverisjen e shkëlqyer, do të jenë dëshmi e unitetit tonë për fitoren e 28 dhjetorit”, deklaroi ai, duke shtuar se “të bashkuar, gjithmonë të fituar”.
