Forca e Sigurisë së Kosovës (FSK) do të organizojë nesër “Ditën e Forcës”, duke hapur dyert e kazermave për qytetarët e interesuar për t’u njohur më nga afër me kapacitetet dhe veprimtarinë e ushtrisë.
Qytetarët janë të ftuar të vizitojnë kazermat e FSK-së në Prishtinë, Prizren, Pomozot, Istog, Ferizaj, Mitrovicë dhe Gjilan. Vizitorët do të kenë mundësinë të shohin ekspozimin e kapaciteteve ushtarake dhe të mësojnë më shumë rreth strukturës dhe funksioneve të ushtrisë.
Kazermat do të jenë të hapura nga ora 9:00 deri në 14:00. Në kazermën “Adem Jashari” pritet të jenë të pranishëm edhe udhëheqës të lartë shtetërorë, mysafirë dhe ambasadorë të vendeve mike, duke e bërë këtë ngjarje një mundësi për qytetarët të shohin nga afër bashkëpunimin dhe prezencën ndërkombëtare në FSK.
