Bashkimi Europian ka bërë të ditur se nga viti 1999 e deri sot ka investuar në Kosovë rreth 3.7 miliardë euro, duke u shndërruar në partnerin më të madh financiar dhe mbështetësin më të fuqishëm të vendit. Përmes një njoftimi, Zyra e BE-së në Kosovë theksoi se këto investime kanë synuar forcimin e institucioneve, zhvillimin ekonomik dhe përmirësimin e cilësisë së jetës për qytetarët.
“Me 3.7 miliardë euro të investuara në Kosovë që nga viti 1999, BE-ja është ofruesi më i madh i ndihmës financiare dhe partneri juaj më i fortë dhe më i besueshëm”, thuhet në deklaratë. Sipas BE-së, kontributet janë fokusuar në ekonominë e vendit, sundimin e ligjit, arsimin, shëndetësinë, infrastrukturën, mbrojtjen e mjedisit dhe energjinë e qëndrueshme, si dhe në promovimin e kulturës.
Zyra e BE-së shtoi se përmes kësaj mbështetjeje po krijohen kushte më të mira për qytetarët, duke ndihmuar në ndërtimin e një të ardhmeje më të qëndrueshme dhe më të ndritur.
“Në çdo hap, BE-ja është në krahun tuaj, duke mbështetur progresin dhe duke ofruar mundësi”, theksohet në njoftim.
