Papa Leo XIV dënoi përdorimin e fesë për të justifikuar “luftën”, “dhunën” ose “fanatizmin” të premten dhe i nxiti katolikët të mobilizojnë besimin e tyre, dhe të bashkojnë të tjerët “pavarësisht nga etnia, kombësia, feja apo perspektivat personale”.
Papa u bëri thirrje besimtarëve të mundësojnë “dialogun dhe bashkëpunimin” midis komuniteteve të ndryshme dhe të shohin humanitetin tek të tjerët, ndërsa përkujtoi një përvjetor të rëndësishëm të kishës në Turqi.
“I gjithë njerëzimi i prekur nga dhuna dhe konflikti po kërkon pajtim. Ekziston një vëllazëri universale burrash dhe grash pavarësisht nga etnia, kombësia, feja apo perspektivat personale. Fetë, nga vetë natyra e tyre, janë ruajtës të kësaj të vërtete dhe duhet t’i inkurajojnë individët, grupet dhe popujt ta njohin këtë dhe ta vënë në praktikë”, tha Leo.
Papa këto deklarata i bëri në festimet për 1700-vjetorin e Koncilit të Nikesë në qytetin veriperëndimor të Iznikut, ku ishte së bashku me udhëheqësin shpirtëror të të krishterëve ortodoksë lindorë, Patriarkun Bartolomeu.
“Ne duhet ta hedhim poshtë fuqimisht përdorimin e fesë për të justifikuar luftën, dhunën ose çdo formë fundamentalizmi apo fanatizmi. Në vend të kësaj, rrugët që duhen ndjekur janë ato të takimit vëllazëror, dialogut dhe bashkëpunimit”, shtoi ai.
