Dogana e Kosovës ka njoftuar për një konfiskim të konsiderueshëm parash në pikëkalimin kufitar të Hanit të Elezit, gjatë një kontrolli rutinë të kryer ditën e sotme.
Sipas njoftimit zyrtar, zyrtarët doganorë kanë ndalur për verifikim të detajuar një automjet, pasi drejtuesi i tij kishte deklaruar se nuk kishte asgjë për të paraqitur. Automjeti është drejtuar në vijën e dytë të kontrollit, ku pas ekzaminimit janë zbuluar 295,270 euro të padeklaruara, të fshehura brenda veturës.
Shuma e parave është sekuestruar në përputhje me procedurat ligjore, ndërsa rasti është referuar për hetime të mëtejshme.
Dogana e Kosovës theksoi se mbetet e përkushtuar në forcimin e kontrolleve kufitare dhe në parandalimin e kontrabandës apo veprimtarive të tjera të kundërligjshme, me qëllim të garantimit të sigurisë dhe mbrojtjes së interesave të vendit.
