Kupa e Botës 2026 do të jetë më e pasura e të gjitha kohërave. Shpërblimet do të jenë në shifra rekord. Do të përfitonte jo pak edhe Shqipëria, nëse në mars do të kalojë fazën e play-off-it.
Këshilli i FIFA-s është mbledhur në prag të finales së Kupës Interkontinentale në Doha, ku ka marrë vendime të rëndësishme në lidhje me zhvillimin e futbollit të moshave dhe çështje financiare. Me entuziazmin në rritje pas hedhjes së shortit më 5 dhjetor 2025, Këshilli ka miratuar një kontribut financiar rekord: 620 milionë euro do të shpërndahen në Kupën e Botës.
Nga kjo shifër, 560 milionë euro, – që do të thotë rritje me 50% në krahasim me edicionin e fundit, – do të jepen si shpërblim për 48 skuadrat pjesëmarrëse. Skuadra kampione do të marrë rreth 42.6 milionë euro, kurse finalistja 28 milionë euro. Skuadra e vendit të tretë do të përfitojë rreth 24 milionë euro e kështu me radhë, deri te vendi i fundit.
Ato kombëtare që do të eliminohen që në fazën e parë do të përfitojnë rreth 7 milionë euro secila. Po ashtu, çdo skuadër e kualifikuar në Botëror do të marrë 1.2 milion euro për të mbuluar shpenzimet e përgatitjeve. Kjo do të thotë se të gjitha federatat pjesëmarrëse në Botëror kanë të garantuara të paktën 9 milionë euro secila.
Skuadra kampione e Kupës së Botës do të kthehej në shtëpi më shumë se 50 milionë euro. “Kupa e Botës FIFA 2026 do të jetë revolucionare edhe në lidhje me kontributin financiar për komunitetin futbollistik botëror”, – ka deklaruar presidenti i FIFA-s, Gianni Infantino.
Në garë për Kupën e Botës është ende edhe Shqipëria, që në maj do të luajë shanset e saj në play-off. Nëse kuqezinjtë bëjnë mrekullinë ndaj Polonisë e më pas ndaj fituesit të çiftit Suedi-Ukrainë, FSHF do të arkëtonte të paktën 9 milionë euro.
