Kryeministri në detyrë, Albin Kurti, ka thënë se Kosova është kategorizuar në grupin A të vendeve lidere në qeverisje digjitale sipas Indeksit të Bankës Botërore për Maturitet të Teknologjisë Qeveritare.
“Kosova kategorizohet në grupin A të vendeve lidere në qeverisje digjitale sipas Indeksit të Bankës Botërore për Maturitet të Teknologjisë Qeveritare (GTMI). Kjo e vendos vendin tonë në mesin e shteteve me nivel të lartë të maturitetit digjital.”
Sipas tij kjo e dëshmon progresin e Kosovës në tri vitet e fundit.
“Rezultatet e publikuara sot dëshmojnë progresin që ka arritur Kosova gjatë tre viteve të fundit në 48 indikatorët kyç të indeksit, të cilët mbulojnë fusha si: sistemet kryesore qeveritare, shtytësit e digjitalizimit në qeveri, përfshirja e qytetarëve dhe ofrimi i shërbimeve publike. Në vitin 2020 Kosova ishte në grupin C, të vendeve me fokus të kufizuar. Në vitin 2022, u kategorizua në grupin B të vendeve me fokus të konsiderueshëm në qeverisje digjitale. Sivjet, jemi në grup A.”
Kurti shton se “avancimi në indeksin GTMI konfirmon përparimin e Kosovës në ofrimin e shërbimeve elektronike dhe në zbatimin e reformave që adresojnë shtyllat kryesore teknologjike, qeverisjen e të dhënave, zhvillimin e shkathtësive digjitale në administratën publike dhe qasjen mbarëqeveritare ndaj transformimit digjital”.
