Bashkimi Europian ka arritur një marrëveshje për t’i dhënë Ukrainës një hua prej 90 miliardë eurosh, duke i ofruar Kievit një mbështetje financiare jetike për të përballuar krizën buxhetore të pritshme. Vendimi u mor gjatë një samiti të zhvilluar në Bruksel, në një moment kritik kur presidenti amerikan Donald Trump po shtyn për një marrëveshje të shpejtë për t’i dhënë fund luftës gati katërvjeçare me Rusinë.
Megjithatë, liderët europianë nuk arritën konsensus për përdorimin e rreth 200 miliardë eurove asete ruse të ngrira në BE, shkruan A2 CNN. Belgjika, ku ndodhet pjesa më e madhe e këtyre fondeve, kërkoi garanci për ndarjen e përgjegjësisë ligjore, gjë që hasi kundërshtime nga vendet e tjera.
Presidenti i Ukrainës, Volodymyr Zelensky, e cilësoi marrëveshjen si një mbështetje të rëndësishme që forcon qëndrueshmërinë e vendit dhe rrit fuqinë negociuese në bisedimet për paqe. Ndërkohë, presidentja e Komisionit Europian, Ursula von der Leyen, tha se Ukraina do ta shlyejë huan vetëm pasi Rusia të paguajë dëmet e luftës.
BE vlerëson se Ukraina ka nevojë për rreth 135 miliardë euro shtesë gjatë dy viteve të ardhshme për të qëndruar financiarisht e qëndrueshme. Vendimi i fundit shihet si një sinjal politik ndaj Moskës, edhe pse debati mbi përdorimin e aseteve ruse mbetet i hapur.
