Espanola, një grup paramilitar ultranacionalist që lufton në krah të Rusisë në Ukrainë, ka konfirmuar të premten vdekjen e liderit të saj, Stanislav Orlov, në rrethana ende të paqarta.
Orlov, i njohur me emrin e luftës “Spanjolli”, e kishte themeluar Espanolën në pranverën e vitit 2022, menjëherë pas nisjes së pushtimit të plotë të Ukrainës nga Rusia, si pjesë e batalionit Vostok në rajonin e pushtuar të Donetskut, në lindje të Ukrainës.
Anëtarët e Espanolës, përfshirë Orlovin, janë huliganë rusë të ekstremit të djathtë. Vetë Orlovi, sipas raportimeve, kishte luftuar përkrah forcave proruse kundër qeverisë ukrainase që nga viti 2014.
Transmetuesi RTVI, duke iu referuar burimeve anonime, raportoi më 10 dhjetor se Orlovi ishte vrarë gjatë arrestimit pas akuzave për trafikim me armë. Fati i tij ishte bërë objekt diskutimesh online në ditët pasuese, derisa Espanola konfirmoi vdekjen e tij.
“Të afërmit dhe miqtë e ngushtë të Stanislav Orlovit i ftojnë të gjithë të bëjnë homazhe për liderin, themeluesin dhe frymëzimin pas Espanolës”, njoftoi grupi në kanalin e tij në Telegram.
Sipas njoftimit, ceremonia mortore do të mbahet të hënën në Katedralen e Krishtit Shpëtimtar në Moskë.
Espanola nuk ka publikuar datën dhe as shkakun e vdekjes së Orlovit.
“Aktualisht, autoritetet qendrore hetimore po punojnë për të përcaktuar shkakun dhe vendin e saktë të vdekjes së tij, si dhe për të identifikuar përgjegjësit”, shkroi Espanola në kanalin e saj në Telegram.
Komiteti Hetimor i Rusisë, institucioni që heton krime të rënda penale, nuk ka reaguar publikisht për vdekjen e Orlovit, shkruan The Moscow Times.
Ndërkohë, informacione të pakonfirmuara nga blogerë pro-luftës pretendojnë se Orlovi u vra gjatë arrestimit, ndërsa të tjerë pohojnë se ai kishte qenë në koma “për disa ditë” para vdekjes.
