Dy kamionë me targa të huaja janë ndëshkuar me gjoba nga Policia Rajonale e Ferizajt, pas ankesave të qytetarëve për ndotje të rrugës magjistrale Ferizaj–Kaçanik. Kamionët ishin angazhuar nga kompani private për transport dheu në zonën e fshatit Komogllavë.
Sipas Policisë, shoferët nuk kishin pastruar gomat e automjeteve para se të hynin në rrugët e asfaltuara, duke shkaktuar ndotje të konsiderueshme në tri pika të ndryshme të magjistrales. Kjo situatë kishte rrezikuar sigurinë në trafik dhe kishte krijuar shqetësim për banorët dhe pjesëmarrësit e tjerë në komunikacion.
Në bazë të Ligjit për Rregullat e Trafikut Rrugor, autoritetet kanë shqiptuar gjoba prej 1,000 eurosh për secilën kompani përgjegjëse, për shkak të shkeljes së rregullave dhe ndotjes së ambientit.
Policia u ka bërë thirrje kompanive ndërtimore dhe transportuese që të respektojnë obligimet ligjore gjatë zhvillimit të punimeve, duke theksuar se është e ndaluar hyrja e automjeteve nga rrugët e pashtruara në rrugë të asfaltuara pa larguar paraprakisht baltën dhe materialet e tjera ndotëse nga gomat. Autoritetet kanë paralajmëruar se kontrollet do të vazhdojnë edhe në ditët në vijim.
