Ylli i Liverpool-it dhe kombëtares së Egjiptit, Mohamed Salah, është vënë sërish në qendër të polemikave në rrjetet sociale, pas një postimi festiv që nuk u prit mirë nga një pjesë e ndjekësve të tij myslimanë. Ashtu si edhe në vitet e kaluara, futbollisti publikoi një foto familjare pranë pemës së Krishtlindjeve, duke uruar “Gëzuar Krishtlindjet”.
Ndërkohë që Salah ndodhet në Marok me kombëtaren egjiptiane për ndeshjet e Kupës së Kombeve të Afrikës, familja e tij në Angli po shijon festat e fundvitit. Pikërisht kjo pamje ka mjaftuar për të nxitur reagime të shumta dhe komente kritike në platformat sociale.
Shumë ndjekës shprehën zhgënjim, duke e konsideruar postimin të papërshtatshëm për një figurë publike myslimane me ndikim global. Disa prej tyre e cilësuan veprimin si “të trishtueshëm” dhe në kundërshtim me vlerat islame, duke theksuar se Salah shihet nga miliona të rinj si shembull dhe model.
Komentet ndaj futbollistit varionin nga kritika të moderuara deri te mesazhe të ashpra, ku i kërkohej të “kishte frikë Zotin” dhe të respektonte fenë dhe kulturën e tij. Pavarësisht reagimeve negative, Salah nuk ka reaguar publikisht ndaj kritikave, duke vijuar të mbajë qëndrimin e tij të zakonshëm për jetën private dhe zgjedhjet personale.
Kjo nuk është hera e parë që një postim i tillë shkakton debat, duke rikthyer edhe një herë diskutimin mbi kufirin mes besimit personal, identitetit kulturor dhe jetës publike të sportistëve të njohur.
❤️ #MerryChristmas pic.twitter.com/ioj3YlaPdc
— Mohamed Salah (@MoSalah) December 25, 2025
