Papa Leoni e ka hapur vitin 2026 me një apel të fortë për paqe, duke vënë theksin te vendet e shkatërruara nga konfliktet dhe te familjet që vuajnë pasojat e dhunës. Të enjten, ai kremtoi Meshën e Vitit të Ri në Bazilikën e Shën Pjetrit dhe më pas udhëhoqi lutjen tradicionale të mesditës nga studioja e tij, përballë Sheshit të Shën Pjetrit, ku ishin mbledhur mijëra pelegrinë dhe turistë.
Papa kujtoi se 1 janari shënon Ditën Botërore të Paqes, duke e shfrytëzuar këtë rast për një mesazh të posaçëm lutjeje. “Le të lutemi së bashku për paqen: së pari mes kombeve të përgjakura nga lufta dhe vuajtjet, por edhe brenda shtëpive tona, në familjet e prekura nga dhuna dhe dhimbja”, u shpreh ai.
Sipas Associated Press, pas një periudhe intensive festash të Krishtlindjes, Papa Leoni do të marrë disa ditë pushim, përpara kremtimit të festës së Epifanisë më 6 janar. Në këtë datë, ai do të mbyllë zyrtarisht edhe Vitin e Shenjtë 2025, një ngjarje që zhvillohet çdo 25 vjet dhe që solli miliona pelegrinë në Romë.
