Ekspertët e shëndetit u kanë bërë thirrje vendeve të Evropës që të frenojnë varësinë nga antibiotikët, në një kohë kur kërcënimi i rezistencës ndaj ilaçeve po rritet. Megjithatë, disa shtete vazhdojnë t’i përdorin këto medikamente me ritme shumë më të larta se të tjerat.
Rezistenca antimikrobike (AMR) ndodh kur patogjenë si bakteret ose viruset evoluojnë deri në atë pikë sa u shmangen ilaçeve ekzistuese, duke i bërë infeksionet më të vështira për t’u trajtuar. Përdorimi i tepërt i antibiotikëve e përshpejton këtë proces, i cili shkakton më shumë se 35 mijë vdekje çdo vit në Bashkimin Evropian, Islandë, Lihtenshtajn dhe Norvegji.
Si pasojë, në vitin 2023, Këshilli i BE-së u kërkoi shteteve anëtare të ulin përdorimin e antibiotikëve dhe të sigurojnë që të paktën 65 për qind e antibiotikëve të përdorur të jenë trajtime të linjës së parë.
Megjithatë, Bashkimi Europian nuk i ka përmbushur asnjërin nga këto objektiva, paralajmëroi muajin e kaluar Qendra Europiane për Parandalimin dhe Kontrollin e Sëmundjeve (ECDC).
Në të gjithë BE-në, njerëzit morën mesatarisht 20.3 doza ditore antibiotikësh për çdo 1,000 banorë në vitin 2024. Kjo shifër është 2 për qind më e lartë se niveli bazë para pandemisë në vitin 2019 dhe dukshëm mbi objektivin e BE-së prej 15.9 dozash ditore deri në vitin 2030.
Përdorimi i antibiotikëve ndryshon ndjeshëm nga një vend në tjetrin në Europë. Vitin e kaluar, normat e dozave ditore varionin nga 9.8 në Holandë deri në 29.9 në Greqi.
Sipas Evelyne Jouvin Marche, e cila koordinon kërkimin shkencor mbi rezistencën ndaj antibiotikëve në Inserm – Instituti Kombëtar i Shëndetit dhe Kërkimeve Mjekësore në Francë – duhet kohë që udhëzimet zyrtare shëndetësore të zbatohen në spitale, klinika, te mjekët dhe pacientët, dhe disa vende janë më të avancuara se të tjerat në këtë proces.
Në shumë shtete europiane, këto trende po shkojnë në drejtimin e gabuar. Që nga viti 2020, përdorimi i antibiotikëve është rritur në Austri, Belgjikë, Kroaci, Estoni, Finlandë, Francë, Islandë, Letoni, Lituani, Luksemburg, Holandë, Norvegji, Portugali, Slloveni dhe Spanjë, tregojnë të dhënat e ECDC-së.
