Reshjet e dendura dhe të pandërprera të shiut gjatë ditëve të fundit kanë shkaktuar vërshime në disa qytete të Kosovës, duke krijuar probleme serioze për qytetarët dhe infrastrukturën, veçanërisht në pjesën perëndimore të vendit.
Instituti Hidrometeorologjik i Kosovës (IHMK) njoftoi se moti me shi, me intervale dhe intensitet të ndryshëm, ka bërë që lumenjtë dhe përrenjtë të dalin nga shtretërit e tyre në komuna si Gjakova, Juniku, Deçani, Malisheva, Rahoveci dhe Klina. Si pasojë, shumë lagje dhe toka bujqësore janë përmbytur, ndërsa komunikacioni është vështirësuar dukshëm.
Sipas IHMK-së, reshjet pritet të vazhdojnë edhe gjatë ditëve në vijim, duke rritur rrezikun e vërshimeve lokale dhe duke shkaktuar probleme në sistemet e kanalizimit, trafik dhe qarkullim rrugor. Megjithatë, institutet përkatëse theksuan se nivelet e ujit në lumenjtë kryesorë të vendit, si Ibri, Sitnica, Lepenci dhe Morava e Binçës, kanë pasur vetëm ngritje të lehta.
Situata emergjente ka prekur edhe rajonin e Mitrovicës, ku Kompania Rajonale e Ujësjellësit ka ndërprerë përkohësisht furnizimin me ujë të pijshëm. Arsyeja, sipas KRU “Mitrovica”, është ngritja e nivelit të turbulleshmërisë në kanalin e Ibër-Lepencit, masë e ndërmarrë për të garantuar sigurinë dhe cilësinë e ujit.
Në Skënderaj, kryetari i komunës Sami Lushtaku vizitoi nga afër lagjet e prekura dhe bëri të ditur se ekipet emergjente kanë qenë të angazhuara që nga mesnata për t’u dalë në ndihmë familjeve të përmbytura. Gjendje e rënduar raportohet edhe në disa zona të Rahovecit dhe Klinës, ndërsa komunat përkatëse kanë apeluar qytetarët që të shmangin lëvizjet e panevojshme dhe të përdorin rrugë alternative.
Përmbytjet janë bërë dukuri e shpeshtë në Kosovë vitet e fundit, duke shkaktuar kryesisht dëme materiale. Ekspertët vlerësojnë se dëmtimi i shtretërve të lumenjve nga nxjerrja e paligjshme e zhavorrit dhe ndërhyrjet e pakontrolluara në natyrë janë ndër faktorët kryesorë që kontribuojnë në përmkeqësimin e këtyre situatave.
Autoritetet lokale dhe qendrore vazhdojnë të monitorojnë gjendjen, ndërsa qytetarët mbeten në pritje të përmirësimit të motit dhe stabilizimit të niveleve të ujit.
