Një ngjarje e rëndë është shënuar në Gjakovë, ku një grua është gjetur pa shenja jete në shtëpinë e saj. Rasti është konfirmuar nga Policia e Kosovës, e cila ka bërë të ditur se në vendin e ngjarjes kanë dalë njësitë përkatëse policore dhe ekipet e emergjencës.
Sipas njoftimit zyrtar, ekipi mjekësor që ka intervenuar në vendngjarje ka konstatuar vdekjen e viktimës, ndërsa për momentin nuk janë dhënë detaje shtesë lidhur me rrethanat e rastit.
Me vendim të prokurorit kompetent, trupi i pajetë i gruas është dërguar në Institutin e Mjekësisë Ligjore për obduksion, me qëllim të përcaktimit të shkakut të vdekjes.
Policia ka nisur hetimet lidhur me këtë rast, i cili për momentin është cilësuar si “hetim i vdekjes”. Autoritetet kanë bërë të ditur se do të informojnë opinionin publik për çdo zhvillim të mëtejshëm.
