Agjencia e Ushqimit dhe Veterinarisë ka izoluar 15 kilogramë djathë “Mozzarella Bufalo”, të prodhuar nga qumështi i bullicës me origjinë nga Italia, i dyshuar për praninë e mundshme të aflatoksinës M1.
Ky produkt, bazuar në njoftimin e AUV-it, është prodhuar nga kompania Caseificio Coop “La Contadina” në Itali dhe importuar nga Premio SHPK, Sllatinë e Madhe dhe së shpejti do të fillojë procesi i asgjësimit të këtij produkti.
“Ky veprim ndërmerret me qëllim garantimin e sigurisë shëndetësore të konsumatorëve dhe për të siguruar respektimin e standardeve të cilësisë ushqimore”.
“Edhe pse Agjencia e Ushqimit dhe Veterinarisë po ballafaqohet me një mungesë të inspektorëve, ajo mbetet e përkushtuar në monitorimin e vazhdueshëm të tregut dhe zinxhirit ushqimor. AUV-ja vazhdon të zbatojë masa parandaluese dhe kontrolluese për të garantuar që konsumatorët në Republikën e Kosovës të kenë në dispozicion ushqim të sigurt, të shëndetshëm”, thuhet në njoftim.
