Komandanti i Forcës së Sigurisë së Kosovës, Gjenerallejtënant Bashkim Jashari, ka zhvilluar një takim zyrtar me Drejtorin e Ushtrisë së Gardave Kombëtare të Shteteve të Bashkuara të Amerikës, Gjenerallejtënant Jonathan M. Stubbs, i cili u shoqërua nga Gjeneral Major Levon E. Cumpton dhe delegacioni përkatës.
Në këtë takim u vlerësua bashkëpunimi i ngushtë dhe i qëndrueshëm ndërmjet FSK-së dhe Byrosë së Gardës Kombëtare të SHBA-së, me theks të veçantë partneritetin me Gardën Kombëtare të Ajovas. Palët diskutuan për mbështetjen e vazhdueshme amerikane në ngritjen e kapaciteteve profesionale, zhvillimin e trajnimeve të përbashkëta dhe rritjen e ndërveprueshmërisë së FSK-së me forcat partnere.
Sipas njoftimit të publikuar nga FSK-ja, Gjenerallejtënant Jashari ka shprehur mirënjohje për përkrahjen e SHBA-së, duke e cilësuar këtë partneritet si vendimtar për zhvillimin dhe modernizimin e mëtejmë të Forcës së Sigurisë së Kosovës.
Po ashtu, gjatë takimit u theksua se Programi i Partneritetit të Përbashkët (SPP) ndërmjet Gardës Kombëtare të Ajovas dhe FSK-së përbën një shembull të suksesshëm të bashkëpunimit, me rezultate konkrete në aktivitete dhe projekte të përbashkëta.
Në përmbyllje, të dy gjeneralët u dakorduan se thellimi i mëtejshëm i bashkëpunimit është thelbësor për avancimin e ndërveprueshmërisë ndërmjet forcave respektive, si dhe u nënvizua rëndësia e mbështetjes së SHBA-së në realizimin e synimit strategjik të Kosovës për anëtarësim në organizatat ndërkombëtare të sigurisë, në funksion të paqes, sigurisë dhe stabilitetit rajonal.
