Qeveria e Zagrebit argumenton se kërcënimet gjeopolitike e bëjnë të domosdoshëm përgatitjen e brezit të ri; rajoni po e ndjek me kujdes këtë lëvizje.
Pas një ndërprerjeje prej 17 vjetësh, Kroacia rikthen shërbimin ushtarak të detyrueshëm. Në ditët e para të vitit 2026, rreth 1.200 të rinj kroatë kanë marrë thirrje për dy muaj trajnimi ushtarak – brezi i parë që përballet me këtë detyrim që nga 2008, një vit para anëtarësimit të vendit në NATO.
Vendimi i qeverisë, i mbështetur nga sondazhet që tregojnë se 7 nga 10 kroatë e mbështesin, synon të përforcojë ushtrinë me më pak se 15,000 personel aktiv dhe të përgatisë të rinjtë për “çdo kërcënim të madh”, sipas Ministrit të Mbrojtjes, Ivan Anušić.
Rihyrja e shërbimit të detyrueshëm vjen në një kontekst rajonal ku disa ish-shtete jugosllave po shqyrtojnë masa të ngjashme. Sllovenia diskuton rikthimin e shërbimit për t’u përgatitur ndaj rritjes së kërcënimeve, ndërsa Serbia planifikon të propozojë legjislacion të ri për rekrutimin e të rinjve.
Ekspertët theksojnë se lëvizja e Kroacisë nuk është shenjë agresioni, por një masë parandaluese për të forcuar kapacitetet mbrojtëse në një rajon të paqëndrueshëm. Toby Vogel nga Këshilli për Politikën e Demokratizimit thotë: “As Kroacia nuk ka plan ofensiv, as Serbia nuk ka për qëllim sulmin; bëhet fjalë për përgatitje dhe strategji preventive.”
Me rikthimin e shërbimit ushtarak, Kroacia shënon një kthim në një traditë të vjetër të forcimit të ushtrisë kombëtare, duke reflektuar një perceptim të ri të sigurisë në Ballkan.
