Gjykata Themelore në Ferizaj ka aprovuar kërkesën e Prokurorisë Themelore të Ferizajt për caktimin e masës së paraburgimit ndaj të pandehurit A.R., për shkak të dyshimit se ka kryer veprat penale vrasje e mbetur në tentativë dhe mbajtje në pronësi, kontroll ose posedim të paautorizuar të armëve, sipas Kodit Penal të Republikës së Kosovës.
Sipas komunikatës së Gjykatës, pas mbajtjes së seancës dëgjimore dhe shqyrtimit të shkresave të lëndës, gjyqtari i procedurës paraprake i Departamentit për Krime të Rënda, Ilir Bytyqi, ka vlerësuar se ekziston dyshimi i bazuar për përfshirjen e të pandehurit në veprat penale për të cilat ngarkohet.
“Ekziston dyshimi i bazuar se më datë 21.12.2025, rreth orës 23:20, në një rrugë të qytetit të Ferizajt, pas një konflikti verbal, i pandehuri, me qëllim që ta privojë nga jeta, ka shtënë disa herë me armë zjarri në drejtim të viktimës A.D.”, thuhet në komunikatë.
Më tej, Gjykata bën të ditur se nga të shtënat viktima ka pësuar plagë nga arma e zjarrit në abdomen, dorë dhe regjion femoral, dhe si pasojë “i dëmtuari i është nënshtruar ndërhyrjes kirurgjikale në QKUK – Prishtinë”.
Po ashtu, sipas vendimit, i pandehuri dyshohet se në të njëjtën datë, kohë dhe vend, në kundërshtim me Ligjin për Armët, ka mbajtur në pronësi dhe posedim armë zjarri të llojit CZ, modeli 70, kalibri 7.65 mm.
Gjyqtari i procedurës paraprake ka aprovuar kërkesën e prokurorit të shtetit si të bazuar dhe, në përputhje me dispozitat e KPPRK-së, ndaj A.R. është caktuar masa e paraburgimit në kohëzgjatje prej një (1) muaji.
