Dyshimet për manipulime me vota, pas Prizrenit, Prokuroria autorizon policinë që të mbledhë prova në Malishevë

Prokuroria Themelore në Gjakovë tha se në kuadër të kompetencave të saj ligjore është duke monitoruar nga jashtë procesin e rinumërimit të rezultateve zgjedhore.

Ajo tha se ka autorizuar Policinë e Kosovës, që në Komunën e Malishevës, të ndërmarrë “të gjitha veprimet e nevojshme, duke përfshirë identifikimin e personave përgjegjës, grumbullimin e informatave dhe sigurimin e provave relevante, të cilat lidhen me dyshimet për manipulim të votave për kandidatë për deputet të Kuvendit të Kosovës”.

Prokuroria Themelore në Gjakovë u zotua se mbetet e angazhuar në mbrojtjen e votës së lirë të qytetarëve dhe të trajtojë çdo rast të dyshuar, me synimin e ruajtjes së integritetit të procesit zgjedhor dhe sundimit të ligjit.