Presidenti i Shteteve të Bashkuara Donald Trump ka deklaruar se ka dërguar një armatë forcash detare amerikane drejt Iranit.
Në një komunikim me gazetarët në Air Force One, presidenti amerikan u shpreh se një masë e tillë është marrë për të qenë të përgatitur për çdo rast kur ndërhyrja do të jetë e nevojshme kundër Teheranit, në paralajmërimin e tij të fundit drejtuar Republikës Islamike.
Trump përsëriti paralajmërimet e mëparshme ndaj Iranit që të mos e rifillonte programin e tij bërthamor ose të ekzekutonte njerëzit e arrestuar gjatë protestave të fundit masive kundër regjimit.
“Kemi shumë anije që shkojnë në atë drejtim, për çdo rast… Do të preferoja të mos shihja të ndodhte asgjë, por po i vëzhgojmë nga shumë afër”, tha Trump, ndërsa kthehej në SHBA nga konferenca e Davosit në Zvicër.
Tensionet u përshkallëzuan në të gjithë Lindjen e Mesme në fillim të këtij muaji, pasi Trump la të kuptohej se ishte gati të ndërhynte në Iran, duke shkruar në mediat sociale se “Ndihma është rrugës”, ndërsa autoritetet iraniane nisën një goditje brutale për të shtypur valën më të madhe të protestave kundër regjimit në vite.
