Zonja e Parë e Shteteve të Bashkuara, Melania Trump, ka folur për herë të parë publikisht lidhur me vrasjen e infermierit 37-vjeçar Alex Pretti në Minneapolis, i cili u qëllua për vdekje nga agjentë të Customs and Border Protection (CBP). Në një deklaratë të saj, ajo u bëri thirrje protestuesve të ushtrojnë të drejtën e protestës në mënyrë paqësore dhe kërkoi unitet kombëtar në një moment tensionesh të larta.
Duke folur në emisionin Fox & Friends, Melania Trump theksoi se vendi ka nevojë për qetësi dhe bashkëpunim institucional. Ajo vlerësoi gjithashtu bisedën mes presidentit Donald Trump dhe guvernatorit të Minesotës, Tim Walz, të cilën presidenti e përshkroi si “një telefonatë shumë të mirë”, përpara se të tërhiqte nga shteti komandantin e CBP-së, Greg Bovino.
“Ne kemi nevojë për unitet. Po bëj thirrje për bashkim. E di që bashkëshorti im, presidenti, pati një bisedë të mirë me guvernatorin dhe kryetarin e bashkisë dhe ata po punojnë së bashku për ta mbajtur situatën paqësore dhe pa trazira,” u shpreh Zonja e Parë. Ajo shtoi prerazi: “Jam kundër dhunës, kështu që nëse protestoni, protestoni në paqe.”
Reagimi i Melania Trump vjen në një kohë kur zemërimi publik po rritet për veprimet e oficerëve të maskuar të ICE dhe CBP në Minneapolis gjatë javëve të fundit. Brenda një periudhe të shkurtër, dy shtetas amerikanë kanë humbur jetën si pasojë e ndërhyrjeve të agjentëve federalë.
Rasti i parë ishte ai i Renee Good, një nënë 37-vjeçare, e cila u qëllua tri herë, përfshirë edhe në kokë, më 7 janar, teksa përpiqej të largohej me makinë nga oficerët e ICE. Vetëm 17 ditë më vonë, Alex Pretti u vra me të shtëna nga afër, ndërsa po ndihmonte një protestuese që ishte rrëzuar në tokë.
Këto ngjarje kanë nxitur protesta masive në qytetet binjake Minneapolis–Saint Paul, ku dhjetëra mijëra qytetarë kanë dalë në rrugë për të kundërshtuar praninë e zgjatur të agjentëve federalë të imigracionit dhe për t’i dhënë fund operacionit njëmujor të administratës Trump, të quajtur “Operation Metro Surge”.
Prindërit e Alex Pretti-t kanë hedhur poshtë kategorikisht pretendimet e zyrtarëve të administratës, përfshirë sekretaren e Sigurisë Kombëtare, Kristi Noem, dhe komandantin Greg Bovino, të cilët e kishin cilësuar atë si “terrorist të brendshëm”. Në një deklaratë prekëse, ata thanë se djali i tyre u vra teksa po përpiqej të mbronte një grua.
“Alex donte të bënte një ndryshim në këtë botë. Fatkeqësisht, ai nuk do të jetë me ne për ta parë ndikimin e tij,” u shprehën ata. “Gënjeshtrat e neveritshme të thëna për djalin tonë nga administrata janë të papranueshme. Në pamjet video, ai nuk mban armë; ka telefonin në dorën e djathtë dhe dorën tjetër të ngritur, ndërsa po mbron një grua që sapo ishte rrëzuar nga ICE.”
Nën presionin e reagimit publik, Shtëpia e Bardhë duket se ka tërhequr disa nga deklaratat e para lidhur me rastin. Zëdhënësja e shtypit, Karoline Leavitt, deklaroi se presidenti Trump nuk e ka cilësuar personalisht Pretti-n si “terrorist” dhe se ai do të presë përfundimin e hetimeve përpara se të komentojë.
“Presidenti dëshiron që faktet dhe hetimi të flasin vetë,” tha ajo, duke lënë të hapur mundësinë e një rishikimi zyrtar të narrativës fillestare rreth vrasjes së Alex Pretti-t.
